Бөкеев (Бөкей) Оралхан (1943-1993) – журналист, жазушы, драматург, Қазақстан Жазушылар одағының мүшесі.
Оралхан Бөкей 1943 жылы 28 қыркүйекте Шығыс Қазақстан облысы Катонқарағай ауданы Шыңғыстай ауылында дүниеге келген.
1961 жылы Сұлтанмахмұт Торайғыров атындағы орта мектепті аяқтаған соң, пионер жетекшісі, «Алтайский» совхозында тракторист болды. 1969 жылы Қазақ мемлекеттік университетін (қазіргі әл-Фараби атындағы ҚазҰУ) бітірген соң, Үлкен Нарын аудандық «Еңбек туы» газеті редакциясында жұмыс істеді. Кейін «Коммунизм туы» (қазіргі «Дидар») газеті, «Лениншіл жас» (қазіргі «Жас Алаш») газеті, «Жұлдыз» журналы редакцияларында қызмет етті. 1991-1993 жж. – «Қазақ әдебиеті» газетінде бас редактор қызметін атқарған.
1970 жылы «Қамшыгер» атты алғашқы жинағы жас жазушының атағын шығарды. «Қайдасың, қасқа құлыным?» (1973), «Мұзтау» (1976), “Ән салады шағылдар” (1978), “Үркер ауып барады” (1981), “Біздің жақта қыс ұзақ” (1984) повестер мен әңгімелер жинағының авторы.
